Shahru Casalkii wuu dhamaaday (The honeymoon is over)

Wax shaki ah haba yaraatee igagama jiro in Puntland ay soo food saari doonto xaalad adag sannadkan gudihiisa. Imtixaanka siyaasadeed ee haysta Madaxweyne Abdiweli M. Ali waxa uu u muuqdaa mid ay ku fashilmi doonaan kooxdan loogu magac daray Xaflad-joog.Hoggaanka jilicsan ee Cabdiweli Gaas ma aha mid Puntland ka samata bixin kara caqabadaha siyaasadeed, dhaqaale iyo amni ee haatan jira iyo kuwa abuurmi doona.

Dadka Puntland iyo Baarlamanka Puntland waxaan ugu baaqayaa iney ka tashadaan oo la xisaabtamaan Maamulkan taagta daran ee khatarta gelinaya midnimadeena iyo jiritaanka Puntland. Puntland waa lagu caano maalay, cidna lagama yeeli karo iney gacmahooda ku burburiyaan. Xilliyadii ugu danbeeyey wixii ka dhacayey Garoowe iyo Puntland guud ahaan waxay ahaayeen kuwo aan la aqbali karin oo khatar badan xanbaarsan, mana muuqato in kooxda Gaas ay fahmi karaan amuurahan iyo xalka loo baahan yahay.

Baarlamanka Puntland waa in aanay noqon makhaayad hadba ninka yimaado iska shito oo mushahar laga qaato ee waa in ay noqdaan kuwo la mid ah baarlamaanada adduunka iyo Soomaaliya oo ay gutaan waajibaadka dastuuriga ah ee ka saaran ilaalinta haykalka Maamul ee Puntland, waana in aan laga oggolaan kooxdan boobka iyo lacag urursiga ku mashquulsan iney khatar sii geliyaan nidaamka jilicsan ee lagu caano maalay ee Puntland. Baarlamaanku waa in ay caddeeyaan iney yihiin metelayaasha shacabka iyo ilaaliyayaasha danta iyo maslaxadda Puntland oo aan la fiirsan koox isa siisay awood xad dhaaf ah oo sidey doonto u dhaqmaysa.

Haddii sannad khasaaray ma aha in aynun iska fariisanno innagoo ayaan daran oo daawanno waxa ka dhacaya Puntland. Qof walba masuuliyad ayaa ka saaran degaankeenna, waxana masuuliyadda inta badan qaadaya Baarlamanka la doortay iyo hoggaamiyayaasha siyaasadda iyo bulshada. Markaa Baarlamanku waa in ay soo gole joojiyaan Madaxweynaha iyo Xukuumaddiisa si loola xisaabtamo, haddii kale dee Puntland ha iska ahaato meel shantii sanoba reer iyo koox u xiran oo la is bedelo ama xukunka la iska dhaxlo sidii gabar la kala dumaalayo oo aan la isla xisaabtami karin.

Waxaan ka rajaynayaa dadka iyo hoggaamiyayaasha siyaasadda iyo bulshada ee Puntland inay qaddiyadan si dhab u fahmaan oo u gudagalaan si loo ilaaliyo Puntland iyo mustaqbalka dadkeeda.Waxaan filayaa in dadka intiisa badan ila qabaan in hoggaanka Madaxweyne Gaas aanay wax horumar ah gaarsiin karin Puntland aan ka ahayn iney u horseedaan dib-u-dhac iyo iney kala daadato, halkii loo doortay iney isku hayaan Puntland-tii loo dhiibay, isla markaana raadiyaan inta maqan, iyagoo ilaalinaya kaalinta Puntland ee siyaasadda Soomaaliya iyo tan gobolka.

Ujeedadeenu waa Puntland oo mid ah, horumar samayneysa oo dadkeeduna ku nool yihiin nabad iyo caddaalad.

Guuleysta

Puntland ha midowdo
Puntland ha iksutashato
Puntland ha is raacdo
Puntland ha ka adkaato lidkeeda
Puntland ha horumarto
Puntland ha guuleysato

Abdirashid Muse