Hanbalyo Maalinta Caalamiga ah ee Haweenka – “ 8-da March waa inna mideysaaye innama kala qaybiso”

Waxaan haweenka Soomaaliyeed iyo kuwa adduun weynaha ugu hanbalyeynayaa maalinta qiimaha badan ee 8-da March. Maalintan waxaa loo asteeyey in la aqoonsado xuquuqda haweenka iyo kaalintooda weyn ee ay ku biiriyaan horumarka bulshooyinka. Marka la eego dadka Soomaaliyeed, haweenku waa asaaska qoyka iyo awoodda wax soo saarka ee qarankeenna weyn. Ma jiraan ereyo lagu cabiri karo wanaaggga iyo waxtarka haweenka Soomaaliyeed ee ilaa gobanimadoonkii, ka hor, iyo xilliyadii ugu danbeeyey ee dalkeenna dhibaatadu la deristay oo haweenku noqdeen waxa lagu badbaaday.

Waa in la garawsadaa dhibaatooyinka faraha badan ee loo geystay haweenka dhabarka adag ee Soomaaliyeed xilliyadii dhibaatadu jirtay iyo haatanba, waana in la aqoonsadaa xuquuqda lama taabtaanka ah ee ay leeyihiin si qarankeennu horey ugu socdo. Xuquuqda haweenku kuma eka oo keli ah ka-qayb-gal kooban oo siyaasadda ah ee waa in la joojiyo dhammaan ficilada iyo dhaqamada xun ee liddiga ku ah haweenka Sooomaaliyeed, kuwaasi oo muddo soo jiitamayey, oo runtiina lagu tilmaami karo xadgudub iyo tacaddi.

Anigoo ku hadlaya magacayga shakhsiga ah, waxaan mar kale haweenka Soomaaliyeed iyo kuwa adduunkaba ugu hanbalyeynayaa maalintan qiimaha badan ee 8-da March. Maalintan waa  in aanay innoo kala qaybin rag iyo dumar, ee waa in dhammaanteen ay inaku midaysaa ilaalinta iyo difaacidda xuquuqda haweenka, waana in la xusuustaa waxa qof walba u tari karo wanaagga iyo horumarka haweenka Soomaaliyeed oo ah hooyooyin, walaalo iyo xaasas.Waxaan haweenka Soomaaaliyeed u rajaynayaa horumar iyo guul

Haweenka Soomaaliyeedoow weligiin horseed ayaad ahaydeen

Abdirashid Muse

abrashidmuse@gmail.com